طريقة رائعة لعمل الكيكه البيتى الهشه
كتير مننا بيعوز حاجه خفيفه ياكلها او حاجه نحلي بيها او نفطر بيها الصبح دلوقت هقولكم علي طريقه كيكه بيتوتيه هاشه واسفنجيه كل الأولاد هيحبوها وتنفع كمان في لانش بوكس للأطفال .
المكونات
- ثلات بيضات
- ثلات اكواب من الدقبق
- كوب من اللبن
- كوب ونصف من السكر
- كوب من الزيت (يفضل زيت عباد الشمس)
- كيسين من البيكنج بودر
- كيسين من الفانيليا
- معلقه خل
- ثلاث ملاعق من الكاكاو الخام
طريقة التحضير
هنبدا بضرب البيض ف الخلاط اومضرب البيض ونضيف عليه الفانيليا بعدين نضيف السكر ونضرب كويس جدا ثم نضيف الزيت ونضرب ثم نضيف اللبن ونضربهم مع بعض كويس جدا حتي يذوب السكر.
هنحضر بوله ونحط فيها الدقيق وننخله كويس جدا ونضيف عليه البيكنج بودر بعدين نضيف عليه الخليط الي ضربناه في الخلاطونقلبهم كويس جدا حتي يخطلتو ببعض.
هناخد نصف الخليط ونضيف عليه تلات معالق من الكاكاو الخام ونقلبهم مع بعض كويس جدا حتي يخطلتو.
هنحضر الصينيه الي هنحط فيها الكيكه هنبطنها بالزيت وممكن نحط فوق الزيت رشه دقيق عشان الكيكه تنزل معانا ومتلزقش في الصينيه.
هنضيف الخليط الأبيض وفوقه الخليط البني.
وندخلها فرن سابق تسخينه علي درجه حراره 180 درجه في الرف الأوسط لمده ساعه الا ربع او حتي تنضج الكيكه ومنفتحش عليها الفرن الا بعد مرور نصف ساعه عشان متهبطش مننا ونختبرها بالخله نشوف هل استوت معانا ولا لسه عايزه شويه في الفرن وبكده تكون الكيكه جهزت نطلعها ونسبها تبرد وننزلها في الطبق ونقطعها مربعات او مثلثات حسب الرغبه وتقدم وبالهنا والشفا.
